Bolludags-bollur með kókosrjóma

Núna styttist í Bolludaginn og mér datt því í hug að deila með ykkur uppskriftinni að hollu bollunum sem ég bý alltaf til. 

Bestar finnst mér bollurnar frá henni Sollu hjá Himneskt enda er hún meistari í eldhúsinu þegar kemur að sykurlausum og bragðgóðum sætindum! Bollurnar eru að auki vegan. 

Með bollunum nota ég svo alltaf heimagerða kókosrjómann minn og bæti jafnvel smá dökku súkkulaði við.

–

–
Dásamlegar Bolludags-bollur

Gefur um 15 bollur

–

Bollurnar:

474 ml jurtamjólk

50g kókosolía eða vegan smjör

3 msk hlynsíróp

1 pakki þurrger

1 tsk vanilludropar

600g fínt spelt eða heilhveiti (ég nota spelt)

1/2 tsk sjávarsalt

–

Súkkulaði:

100 gr dökkt súkkulaði brætt, einnig má bræða saman við 2 tsk af kókosolíu fyrir örlítið mýkra krem.

–

1. Skerið jurtasmjörið í litla bita og setjið í pott með jurtamjólkinni, hlynsírópinu og vanillu. Hrærið í á meðan smjörið bráðnar, takið af hellunni og kælið svo þessi blanda verði um 37°C.

2. Þegar blandan hefur kólnað niður í 37°C hellið henni í hrærivélaskál, stráið þurrgerinu yfir og látið standa í um 15 mín..

3. Blandið speltinu og saltinu út í og hrærið saman. Látið standa á frekar hlýjum stað með viskastykki yfir skálinni svo það geti hefast í um 20-30 mín.

4. Þar sem þetta deig er klístrað þá finnst okkur gott að nota ískúluskeið til að móta um 15 bollur sem eru settar á bökunarpappír á ofnplötu.

5. Látið bollurnar hefast aftur í svona 20 mín á plötunni áður en þær eru settar í ofninn.

6. Bakast við 190°C í um 20 mínútur. Leyfið að kólna áður en súkkulaðið er sett yfir.

Uppskriftin er frá Sollu hjá Himneskt.

–

Lesa einnig:
Hreinsandi gulrótarmúffur sem hafa aldrei farið eins hratt!
Páskakonfekt
Vanillubollakökur með hindberjasmjörkremi (vegan og glútenlausar)

–

–

Kókosrjómi

Kókosrjómi er afar einfaldur og kom sem bjargvættur eftir að ég breytti um lífstíll, enda er ég mikið fyrir ís og rjóma!

Ein dós kókosmjólk

2 steviudropar með vanillu

1. Kælið kókosmjólkina í ísskáp yfir nóttu. Hellið mestum vökvanum úr dósinni, þar til bara hnausþykki parturinn situr eftir og setjið í matvinnsluvél ásamt steviudropum. Hrærið eins og þið mynduð hræra venjulegan rjóma þar til áferðin minnir á hefðbundinn rjóma.

Að lokum er gott að bræða dökkt súkkulaði í vatnsbaði og setja ofaná bollurnar.
–

Ef þér líkaði þessi færsla, endilega deildu henni með vinkonu eða öðrum sem þú veist að elskar bollur

Mundu svo að taggaðu okkur á Instagram @lifdutilfulls – við elskum að sjá ykkar útfærslur!

Gleðilegan bolludag elsku vinir.